"Həkimlərimizi tanıyaq!" rubrikamızda saytımızın oxucularına Şuşa Rayon Mərkəzi Xəstəxanasının həkim-infeksionisti Nərgiz Ağayeva haqqında məlumatları təqdim edirik.
O, 1959-cu ildə Ağdam rayonunda anadan olub. 1978-1984-cü ildə Azərbaycan Tibb Universitetində təhsil alıb. Təhsilini bitirdikdən sonra Şuşa şəhərində uşaq sanatoriyasının laboratoriyasında fəaliyyətə başlayıb.
N.Ağayeva 1985-ci ildə Şuşada yay məktəbində həkim işləyib. 1986-cı ildə Şuşa Rayon Mərkəzi Xəstəxanasının Kilinik laboratoriyasında həkim-laborant vəzifəsində çalışıb. 1987-1988-ci illərdə Şuşa Tibb Texnikumunda müəllimlik fəaliyyəti ilə məşğul olub. 1992-ci ildə Bakıda 2 saylı Tibb Texnikumunda infeksion xəstəliklər üzrə müəllim işləyib.
1993-cu ildə məcburi köçkünlərin müalicə və dərmanlarla təmini məqsədilə könüllülük fəaliyyəti göstərib.
O, 1993-cü ildən Şuşa Rayon Mərkəzi Xəstəxanasında infeksionist vəzifəsini icra edir.
2022-ci ildə Həkimlər Günü münasibətilə TƏBİB tərəfindən Fəxri fərmanla təltif olunub.