Ümummilli Lider Heydər Əliyevin 100 illik yubileyinə həsr olunmuş Özbəkistan-Azərbaycan səhiyyə dekadası çərçivəsində Özbəkistan Respublikasından gələn həkim nümayəndə heyəti TƏBİB-in tabeliyində fəaliyyət göstərən "Yeni Klinika"nı ziyarət edib.
"Yeni Klinika"dan Aztibb.az-a bildirilib ki, qonaqlara klinikada icbari tibbi sığortanın Xidmətlər Zərfi daxilində icra edilən əməliyyatlar və göstərilən xidmətlər barəsində geniş məlumat verilib.
Nümayəndə heyəti gələcəkdə əməkdaşlıq çərçivəsində mübadilə proqramlarına qoşulmaq istədiklərini bildirərək göstərilən diqqətə görə minnətdarlıqlarını ifadə ediblər.
Nümayəndə heyətinin tərkibində Özbəkistan Təcili və Təxirəsalınmaz Tibbi Yardım Elmi Mərkəzinin Namanqan filialının Anesteziologiya və reanimasiya şöbəsinin müdiri, anestezioloq-reanimatoloq Murodullo Eraliyev, Özbəkistan Təcili və Təxirəsalınmaz Tibbi Yardım Elmi Mərkəzinin Qəbul-diaqnostika şöbəsinin müdiri, ümumi cərrah Davron Kərimov, Özbəkistan Təcili və Təxirəsalınmaz Tibbi Yardım Elmi Mərkəzinin ümumi cərrahı Caxongir Yarov iştirak ediblər.