Tədbiri giriş nitqi ilə açan Binəqədi Tibb Mərkəzinin direktoru Əsədulla Sultanov böyük zəfərə gedən yolun başlanğıcı olan 27 sentyabr tarixinin xalqımızın qəlbində daim yaşayacağını, qəhrəman şəhidlərimizin əziz xatirələrini biz və bizdən sonrakı nəsillərin yaşadacağını bildirib. Bu tarixin həm kədərli, eyni zamanda qürulu tarix olduğunu qeyd edən Ə.Sultanov bizə şanlı zəfəri yaşadan şəhidlərimizin ailə üzvlərinin hər zaman dövlətin diqqət və qayğısı ilə əhatə olunduğunu vurğulayıb. 

 

Diqqətə çatdırılıb ki, 44 günlük Vətən müharibəsində Prezident, Müzəffər Ali Baş Komandan İlham Əliyevin rəhbərliyi altında rəşadətli Ordumuz 30 ilə yaxın işğal altında olan torpaqlarımızı azad etməklə tarixi Qələbə qazanıb. 2020-ci ilin sentyabrın 27-də başlanan və 44 gün davam edən Vətən müharibəsi zamanı Müzəffər Ali Baş Komandanın müdrik və qətiyyətli rəhbərliyi sayəsində rəşadətli Ordumuz, cəsur əsgər və zabitlərimiz misilsiz şücaət göstərib, qəhrəmanlıq salnaməsi yazıblar.

 

Daha sonra Binəqədi Tibb Mərkəzinin Doğum evinin rəhbəri Zeynəb Hüseynova çıxış edərək 30 illik həsrəti sona çatdıran qəhrəman əsgərlərimizlə qürur duyduğunu bildirib. O, xalqımızın Ali Baş Komandanın ətrafında bir yumruq kimi birləşdiyini və zəfərin milli vəhdətlə gəldiyini vurğulayıb.

 

Binəqədi Tibb Mərkəzinin ümumi cərrahı Pərviz Abbasov Azərbaycan Respublikasının Prezidenti İlham Əliyevin həm hərbi sahədə, həm də diplomatiya sahəsində apardığı uğurlu siyasətin yekunu olaraq 30 illik həsrətin sona çatdığını qeyd edib. P.Abbasov xalqımızın qəhrəmanlığının daim digər xalqlara örnək olacağını bildirib.

 

Vətən müharibəsində ön cəbhə xəstəxanalarında yaralı hərbçilərimizə tibbi yardım göstərən Binəqədi Tibb Mərkəzinin ümumi cərrahı Vüsal Sədrayev müharibə zamanı tibb işçilərinin fədakar fəaliyyətindən bəhs edib.

 

Vətən müharibəsi qazisi, Binəqədi Tibb Mərkəzinin əməkdaşı Nahid Muradov öz döyüş yolundan söz açaraq şəhidlərimizin əziz xatirəsinin xalqımızın qəlbində daim yaşayacağını deyib.