TƏBİB-in tabeliyində fəaliyyət göstərən Pirallahı Tibb Mərkəzində 27 Sentyabr - Anım Günü ilə əlaqədar tədbir keçirilib.

 

Mərkəzdən Aztibb.az-a verilən məlumata görə, Pirallahı rayon şəhidlərinin adı olan xatirə lövhəsinin önünə əklil qoyulub və şəhidlərimizin əziz xatirəsi 1 dəqiqəlik sükutla yad edilib.

 

Bildirilib ki, 27 sentyabr müasir tariximizə qəhrəmanlıq və şərəfli gün kimi daxil olduğu üçün heç zaman xalqımızın yaddaşından silinməyəcək. Azərbaycan Prezidenti, Ali Baş Komandan İlham Əliyevin rəhbərliyi, Ordumuzun gücü ilə 44 günlük Vətən müharibəsində biz böyük Qələbə qazandıq, torpaqlarımız işğaldan azad olundu. Bu Zəfərlə biz qürur duyuruq. Bu Qələbə uzaqgörən siyasətin nəticəsidir.

 

Qeyd olunub ki, bu gün şəhidlərimizin xatirəsini anmaqla yanaşı, 44 günlük müharibənin qələbə hissini yaşayırıq. Məhz bu gündə uzun illər işğal altında qalan torpaqlarımızın azad olunmasına başladıq və 44 gün müddətində qəhrəman oğullarımızın canı, qanı hesabına bu şərəfli missiyanı yerinə yetirdik, gələcək nəsillərə saxlamadıq.