TƏBİB-in tabeliyində fəaliyyət göstərən Göygöl Rayon Mərkəzi Xəstəxanasında “Xəstəliklərin aşkarlanmasında müasir diaqnostikanın rolu” mövzusunda seminar keçirilib.
Xəstəxanadan Aztibb.az-a bildirilib ki, tədbir Azərbaycan Radiologiya Cəmiyyətinin, “Bayer” şirkətinin dəstəyi ilə keçirilən seminarın əsas məqsədi Azərbaycan radiologiya elmini təbliğ etmək, müvafiq tibbi xidmətin keyfiyyətini təkmilləşdirmək və həkimlərin professionallığını artırmaqdır.
Tədbir Azərbaycan Respublikası Dövlət Himninin səsləndirilməsi ilə başlayıb, daha sonra ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi 1 dəqiqəlik sükutla yad edilib.
Daha sonra çıxış edən tibb müəssisəsinin direktoru Vasif Əliyev seminarın iştirakçılar və həkimlər üçün faydalı olacağını vurğulayıb.
"ZOOM" platforması üzərindən keçirilən tədbirdə ətraf rayonlardan radioloqlar, pediatrlar, fərqli ixtisaslı cərrah həkimlər də iştirak ediblər.
Seminarda həkim-radioloqlar tərəfindən “Neyroradiologiyada nadir tapıntılar”, “Fetal kardiak skrininq”, “Süd vəzi xərçənginin diaqnostikasında tomosintezin rolu”, “Qaraciyər və ürək çatışmazlığı”, “Radioloji əlaqə, vaskulyar invaziv radiologiya”, “Kardiak MRT-də kontrast maddənin rolu”, “Anadangəlmə ürək qüsurlarında kardiak KT angioqrafiyanın rolu” və b. mövzularda təqdimatlar edilib.
Sonda iştirakçıları maraqlandıran suallar cavablandırılıb.
