Türkiyə Respublikasının paytaxtı Ankarada Ümumdünya Səhiyyə Təşkilatının Avropa Bürosunun, Səhiyyə Sahəsində Siyasət və Tədqiqatlar Mərkəzinin təşəbbüsü ilə “İİV infeksiyası ilə mübarizədə dayanıqlı xidmətin təmini” mövzusunda beynəlxalq tədbir keçirilib.

 

Səhiyyə Nazirliyinin Respublika QİÇS-lə Mübarizə Mərkəzindən Aztibb.az-a bildirilib ki, tədbirə İİV-ə (insanın immunçatışmzalığı virusu) testləşmə strategiyasına milli proqramın məsul nümayəndələri və səhiyyə müəssisəsinin texniki səviyyəli mütəxəssisləri dəvət olunublar.

 

Azərbaycanı beynəlxalq tədbirdə İİV-lə mübarizə tədbirlərinin milli koordinatoru kimi Səhiyyə Nazirliyinin Respublika QİÇS-lə Mübarizə Mərkəzinin direktoru Famil Məmmədov və Mərkəzin Laboratoriya müdiri Səbinə İbrahimova təmsil ediblər.

 

Tədbirdə regional layihə çərçivəsində İİV üzrə laboratoriyalara təlim səfəri təşkil edilib, testləşmə xidmətinin desentralizasiyası, İİV-ə testləşmə alqoritminin sadələşdirilməsi və keyfiyyətinin yüksəldilməsi ilə bağlı müzakirələr aparılıb.

 

Toplantı zamanı Azərbaycanın İİV-lə mübarizə üzrə təcrübəsi paylaşılıb, əldə olunan nailiyyətlər barədə təqdimat edilib.