“Həkimlərimizi tanıyaq!” rubrikamızda Sizlərə ağır vəziyyətdə olan insanlara vaxtında və zəruri tibbi xidmət göstərməyi, saniyələr ərzində düzgün qərar verməyi bacaran yüksəkixtisaslı mütəxəssis, təcili tibbi yardım həkimi Tofiq Bayramovu təqdim edirik.
O, 1988-ci ildə Azərbaycan Tibb Universitetinin Pediatriya fakültəsini bitirib. 1988-1989-cu illərdə 3 saylı Uşaq Klinik Xəstəxanasında internatura keçib.
Tofiq Bayramov əmək fəaliyyətinə 1986-cı ildə A.F.Qarayev adına 2 saylı Uşaq Klinik Xəstəxanasında tibb qardaşı kimi başlayıb, 1988-ci ilə qədər orada işləyib. 1989-2012-ci illərdə Bakı şəhəri Təcili Təxirəsalınmaz Tibbi Yardım Stansiyasında anestezioloq-reanimatoloq vəzifəsində çalışıb. 2012-ci ildən Azərbaycan Respublikası Dövlət Gömrük Komitəsinin Tibbi Xidmət İdarəsi, Mərkəzi Gömrük Hospitalında təcili yardım həkimi kimi fəaliyyət göstərir.
Həkim Mərkəzi Gömrük Hospitalında protokola (CPR, BLS, ACLS, ATLS) uyğun olaraq reanimasiya və stabilləşdirmə tələb edən ağır xəstə və yaralanan xəstələrin təcili qəbulu, stabilləşdirilməsi və ixtisasçılara ötürülməsi, kardiovaskulyar, pulmonar, mədə-bağırsaq, kranioserebral və endokrinoloji xəstəlikləri olan pasiyentlər üçün ilkin qiymətləndirmə və yardım, xəsarət almış və şok halında olan xəstələrin, eləcə də beyin zədəsi olanların Glazgo Koma şkalası ilə qiymətləndirilməsi və ilkin yardım, boyun və onurğanın zədələnməsi zamanı immobilizasiya, kiçik cərrahi prosedurların aparılmasını həyata keçirir.
Özünə qarşı tələbkar olan yüksəkixtisaslı həkim Tofiq Bayramov müxtəlif ölkələrdə keçirilən konfranslarda, kurslarda, təlimlərdə həvəslə iştirak edir, bəhrələndiyi təcrübələri öz işində tətbiq edir.
