Aztibb.az xəbər verir ki, bu barədə TƏBİB-in feysbuk səhifəsindəki məlumatda bildirilir.

 

Qeyd olunub ki, pasiyentin yaxınları Abşeron Rayon Mərkəzi Xəstəxanasının uzman ürək-damar və endovaskulyar cərrahı Eldar Bağırovdan onu müayinə etməyi istəyiblər. Müayinə sonrası Niyaməddin Nəbiyev Abşeron Rayon Mərkəzi Xəstəxanasına yerləşdirilib.

 

Pasiyentə Eldar Bağırov tərəfindən xəstəxananın hibrid əməliyyat otağında invaziv proseduru icra edilib. Xəstədə əvvəlcə yalnız sol ayaqda tromboz diaqnozu olsa da, düzgün olmayan müalicə nəticəsində sağ ayağının dərin damarında da kəskin tromboz yaranmışdı. Həmçinin ilk müalicə aldığı tibb müəssisəsində taxılan vena kava filtrinin içərisi tamamilə trombla dolmuş və tıxalı olub.

 

"Eyni əməliyyatda sağ ayağı, daha sonra vena kava filtrinin içərisini, sonda isə sol ayağın dərin venalarını tromblardan tamamilə təmizlədik. Bu prosedurlar unikal 4 mərhələli invaziv tromboektomiya və tromboaspirasiya vasitəsilə həyata keçirildi. Adətən pasiyentlərdə bir seansda cəmi bir nahiyə üzrə bu prosedur həyata keçirilsə də, biz N.Nəbiyevə tək seansda 3 fərqli nahiyədə əməliyyat icra etməli olduq.

İnvaziv damar prosedurlarının tətbiqi üçün müasir standartlara uyğun şərait yaradan Abşeron Rayon Mərkəzi Xəstəxanasına və TƏBİB-ə təşəkkür edirəm”, - deyə cərrah Eldar Bağırov bildirib.

 

Məlumat üçün bildirək ki, uzman ürək-damar və endovaskulyar cərrah Eldar Bağırov 1997-2003-cü illərdə Azərbaycan Tibb Universitetində bakalavr, 2004-2010-cu illərdə Ege Universitetinin Ürək-damar cərrahiyyəsi bölməsində uzmanlıq təhsili alıb. 2011-2012-ci illərdə Osmangazi Universitetində, 2014-2023-cü illərdə İhtisas Xəstəxanasında çalışıb. 2017-ci ildən bu günə qədər Türkiyədə aktiv yüzlərcə xəstəyə endovaskulyar cərrahi prosedurlar həyata keçirib. O, hazırda Abşeron Rayon Mərkəzi Xəstəxanasında vətəndaşlarımıza yüksək səviyyədə xidmət göstərir.