Tibbi Ərazi Bölmələrini İdarəetmə Birliyi (TƏBİB) "Türkiyə-Azərbaycan İş Adamları və Sənayeçiləri İctimai Birliyi"nin (TUİB) təşkilatçılığı ilə keçirilən "Azərbaycan sağlıq görüşləri" çərçivəsində "1-ci Atroplastika" konfransında təmsil olunub.

 

Aztibb.az TƏBİB-in feysbuk səhifəsinə istinadla bildirir ki, 16-17 sentyabr tarixlərində keçirilən tədbir Ümummilli Lider Heydər Əliyevin 100 illik yubileyinə həsr olunub.

 

Tədbirdə Azərbaycan Respublikasının Milli Məclisinin Səhiyyə Komitəsinin sədri Əhliman Əmiraslanov, komitə üzvləri Kamran Əliyev, Kamilə Əliyeva, Müşfiq Məmmədli, İlham Məmmədli, TƏBİB-in İcraçı direktorunun müavini Araz Nəsirov, ATU Tədris Cərrahiyyə Klinikasının Travmatologiya və ortopediya kafedrasının direktoru Cəfər Nəsirli iştirak ediblər.

 

Konfransda çıxış edən TƏBİB-in İcraçı direktorunun müavini Araz Nəsirov dövlət-özəl sektor tərəfdaşlığı modelinin tətbiqinin uğurlarından, ölkədə səhiyyə sisteminin gücləndirilməsi və tibbi xidmətlərə əlçatanlığın təmin olunması ilə əlaqədar görülən işlərdən bəhs edərək ortopediya ilə bağlı da mühüm irəliləyişlərin olduğunu vurğulayıb.

 

Konfransda 4 panel müzakirəsi: “Total bud-çanaq artroplastikasında təməl mövzular”, “Total bud-çanaq artroplastikasında ağırlaşmalar”, “Primer total diz artroplastikası”,”Reviziya total dizdə təməl prinsiplər” mövzularında olub. Müzakirələrdə Türkiyədən dəvət edilən tanınmış cərrah, prof. Mehmet Serdar Binnet, prof. Kerem Başarır, dos. Sefa Aktı, prof. Berk Güçlü, prof. Zekeriya Öztemür çıxış ediblər.