Nümayəndə heyətinin tərkibində Tibbi Ərazi Bölmələrini İdarəetmə Birliyinin (TƏBİB) və Səhiyyə Nazirliyinin nümayəndələri təmsil olunublar.

 

Aztibb.az TƏBİB-in rəsmi feysbuk səhifəsinə istinadla xəbər verir ki, 12-13 sentyabr tarixlərini əhatə edən seminarda TƏBİB-in İctimaiyyətlə əlaqələr və kommunikasiya departamentinin rəhbəri Zamirə Ədilova iştirak edib.

 

Təlim sağlamlıq kontekstində insan davranışlarını və onun xəstəliklərin ötürülməsində müəyyənedici rolunu başa düşmək, müxtəlif yanaşmaları müzakirə etmək və yoluxucu xəstəliklərin yayılmasına nəzarətdə sosial və davranış elmlərinin tətbiqi barədə biliklərin artırılmasına yönəlib.

 

Seminarın birinci günündə "Sosial və davranış elmləri və onların yoluxucu xəstəliklərin yayılma təhlükəsinə hazırlıq tədbirləri görülməsində rolu", "İnfodemik idarəetmədə milli və qlobal perspektivlər" və "Epidemiyaya qarşı mübarizədə sosial və davranış elmləri üzrə tədqiqat işi" mövzularında Avropa Xəstəliklərin Qarşısının Alınması və Nəzarəti Mərkəzindən, Robert Koch İnstitutundan və Ümumdünya Səhiyyə Təşkilatından nümayəndələr müxtəlif təqdimatlar nümayiş etdiriblər.

 

Tədbirin ikinci günündə isə "COVID-19 pandemiyası zamanı sosial və davranış elmlərinə perspektivlərin dəyişdirilməsi", "COVID-19 pandemiyasına sosial və davranış elmlərinin inteqrasiyası ilə bağlı öyrənilmiş dərslər: Hollandiya, Finlandiya, Böyük Britaniya və İrlandiya təcrübələri" və "Sosial elmlərin tədqiqat nəticələrinin rəhbər şəxslərə məruzəsi" mövzularında təqdimatlarla çıxışlar olub. Seminar boyunca müxtəlif praktiki məşqlərə də yer verilib.

 

Qeyd edək ki, seminarda Azərbaycan, Gürcüstan, Moldova, Ukrayna, Əlcəzair, Misir, İsrail, İordaniya, Livan, Liviya, Mərakeş, Fələstin və Tunis və digər ölkələrin səhiyyə və kommunikasiya üzrə mütəxəssisləri iştirak ediblər.

Seminarın sonunda iştirakçılara sertifikatlar təqdim olunub.