Ümumdünya Səhiyyə Təşkilatının (ÜST) Azərbaycandakı Nümayəndəliyi Tibbi Ərazi Bölmələrini İdarəetmə Birliyinin (TƏBİB) əməkdaşlığı, Avropa İttifaqının (Aİ) maliyyə dəstəyi ilə həyata keçirilən "Psixi sağlamlıq xidmətlərinin münaqişədən sonrakı dövrdə koordinasiyası və transformasiyası" layihəsi çərçivəsində yerli təlimçilər üçün Psixi Sağlamlıq Çətinlikləri üzrə Fəaliyyət Proqramı (mhGAP) təliminin ikinci hissəsini təşkil edib.

 

Aztibb.az TƏBİB-in rəsmi feysbuk səhifəsinə istinadla bildirir ki, təlim 8-12 sentyabr tarixlərini əhatə edib. “mhGAP” üzrə beynəlxalq sertifikatlı təlimçi Nino Maxaşvili tərəfindən keçirilən 5 günlük təlim zamanı 20 yerli təlimçi depressiya, intihar, stres, uşaq və yeniyetmələrdə psixi sağlamlıq mövzuları barədə məlumatlar əldə ediblər.

 

Bununla yanaşı, gələcək təlimçilərin təqdimat və idarəçilik bacarıqlarının təkmilləşdirilməsi məqsədilə qrup işləri təşkil olunub.

 

Təlimin son günündə isə iştirakçılar seçdikləri mövzu üzrə qrup işləri hazırlayaraq nəzəri biliyi praktikada tətbiq ediblər.

 

Sonda təlim iştirakçıları sertifikatlarla təltif olunublar.