Professor Okan Bülent Yıldız hormonal xəstəliklər sahəsində süni intellekt və zədələnmiş hüceyrələr, toxumalar və orqanların yenidən işlək vəziyyətə gətirilməsinə dair tədqiqatlarla məşğul olan 27 mindən çox alimin iştirak etdiyi Amerika Endokrinologiya Konqresinin (ENDO) həmsədri seçilən ilk türkiyəli alim olub.

Aztibb.az medimagazin.com.tr-yə istinadla xəbər verir ki, Hacettepe Universiteti Tibb Fakültəsi Endokrinologiya və Metabolizm Bölməsinin müəllimi olan Okan Bülent Yıldız türk tibbinin getdikcə daha yüksək yerlərə gəldiyini və türk alimlərinin ölkə daxilində və xaricdə əhəmiyyətli araşdırmalar apardıqlarını, eləcə də əhəmiyyətli vəzifələrdə söz sahibi olduqlarını deyib.

Türkiyədə tibbin bir çox sahələrində vacib elmi araşdırmalar apardığını dilə gətirən O.Yıldız xüsusilə piylənmə və qadın metabolik sindromu ilə bağlı aparılan tədqiqatlara diqqət çəkib. O, dünyada hormon xəstəlikləri olaraq bilinən endokrinologiya sahəsində iki ayrı qeyri-hökumət təşkilatından birinin Avropa Endokrinologiya Dərnəyi, digərinin isə Amerika Endokrinologiya Cəmiyyəti olduğunu deyib.

Qeyd edək ki, alim 2017-ci ildə Avropa Endokrinologiya Dərnəyinin Portuqaliyada keçirilən konqresinin prezidenti seçilib.