TƏBİB, Gənclər və İdman Nazirliyinin dəstəyi və Azərbaycan Diabet Liqasının (ADL) təşkilatçılığı ilə 1-ci tip şəkərli diabet olan uşaqlar üçün nəzərdə tutulan yay düşərgəsinin bitməsi münasibətilə tədbir keçirilib.

 

02-07 sentyabr tarixlərini əhatə edən və “Cırtdan” uşaq istirahət və əyləncə mərkəzində təşkil olunan düşərgədə uşaqlar müxtəlif məşğələlərdə, müsabiqələrdə iştirak etməklə öz yaradıcılıq imkanlarını üzə çıxarıb və bacarıqlarını inkişaf etdiriblər.

 

“Şəkərli diabet üzrə 2005-2009-cu illər üçün Dövlət Proqramı”nda şəkərli diabetlə xəstə olan şəxslərə sanator-reabilitasiya yardımının təşkil edilməsi haqqında 39-cu bəndə uyğun olaraq TƏBİB-in nəzdindəki Respublika Endokrinoloji Mərkəzin əməkdaşlığı, “Novo Nordisk”, “Medtponik” şirkətlərinin sponsorluğu ilə keçirilən yay düşərgəsində bu il 100 uşaq iştirak edib.

 

Düşərgə dövründə diabetli uşaqlara xəstəliklərinə uyğun proqram tərtib edilərək öz xəstəlikləri ilə necə yaşamaq üçün dərslər keçirilib, psixoloqlar tərəfindən uyğun yardımlar göstərilib.

 

Bağlanış mərasimində uşaqlar öz yaradıcılıqlarını nümayiş etdirib, düşərgə müddətində müxtəlif müsabiqələrə qatılan qaliblər mükafatlandırılıb və təşəkkürnamələr təqdim edilib.