“Azərbaycan Qan Donorluğunun İnkişafı Mərkəzi”nin İdarə Heyətinin qərarı ilə Azərbaycanın cüdo idmanı növü üzrə ikiqat Paralimpiya Oyunları çempionu, ikiqat dünya çempionu və səkkizqat Avropa çempionu, 2015 Avropa Oyunları çempionu, Azərbaycanın Əməkdar İdman Ustası, Əməkdar məşqçi, 7-ci dan sahibi, Qarabağ müharibəsi əlili və qazisi İlham Zəkiyev AQDİM-nin fəxri üzvü seçilib.
Mərkəzin mətbuat xidmətindən Aztibb.az-a verilən məlumata əsasən, “Azərbaycan Qan Donorluğunun İnkişafı Mərkəzi”nin əsas məqsədi ölkəmizin müvafiq dövlət orqanları və özəl sektorları ilə qan donorluğu sahəsində yaxından əməkdaşlıq etmək, eyni zamanda Bakı və regionlarda bu istiqamətdə aparılan işlərin daha da gücləndirilməsinə dəstək verməkdir. Həmçinin qan donorluğu və irsi qan xəstəliyi ilə bağlı gənclər arasında təbliğatın gücləndirilməsi də qurumun əsas vəzifələrindəndir.
Qeyd edək ki, qanvermə aksiyaları və təbliğat xarakterli tədbirlər Prezidenti İlham Əliyevin təsdiq etdiyi "Hemofiliya və Talassemiyadan əziyyət çəkən uşaqlara qayğı" Dövlət Proqramına uyğun, həmçinin Heydər Əliyev Fondunun "Talassemiyasız həyat naminə" proqramı çərçivəsində təşkil olunur.