Aztibb.az xəbər verir ki, Diaqnoz Tibb Mərkəzinin təcrübəli həkim-hepatoloqu Tofiq Əkbərov daha çox kimlərin Hepatit B riski daşdığını açıqlayıb.

 

Həkim bildirib ki, qan köçürülmüş insanlar, venadaxili narkotik qəbul edən şəxslər, hemofiliya xəstələri (tez-tez qan köçürülməyə məruz qaldığı üçün), yoluxmuş hamilə qadından doğulan körpələr daha yüksək risk altındadırlar: "Həmçinin birdən artıq cinsi partnyoru olanlar, hemoseksualistlər, eləcə də yoluxmuş insanlarla öpüşənlər, o cümlədən gözəllik salonları və bərbərlərdən istifadə edənlər də risk qrupuna daxildirlər".

 

Hepatit B-nin simptomlarından bəhs edən T.Əkbərov qeyd edib ki, bir çox hallarda heç bir şikayət olmur. O, vaxtında və düzgün müalicə taktikası seçilərsə Hepatit B-dən sağalmağın mümkünlüyünü bildirib.

 

"Hepatit B qaraciyər sirrozu və ya qaraciyər xərçəngi ilə ağırlaşmayıbsa bu virusu müalicə etmək mümkündür. Əgər ağırlaşma olubsa, yenə də Hepatit B-nin müalicəsi individual taktika ilə aparılmalıdır", - deyə hepatoloq əlavə edib.