"Həkimlərimizi tanıyaq!” rubrikasının növbəti qonağı Əməkdar həkim, pediatr Etibar Həşimovdur.

O, 1948-ci ildə Lerik rayon Rəzgov kəndində anadan olub. 1966-1972-ci illərdə N.Nərimanov adına Azərbaycan Dövlət Tibb İnstitutunun Pediatriya fakültəsində təhsil alıb.

E.Həşimov 1972-ci ildən Lerik Rayon Mərkəzi Xəstəxanasında baş pediatr kimi fəaliyyət göstərir. 2019-cu ildən Lerik Rayon Mərkəzi Xəstəxanası PHŞ-in Ailə-Sağlamlıq Mərkəzinin şöbə müdiri vəzifəsində çalışır.

Həkim mütəmadi olaraq tibbi bilik və bacarıqlarını artırmaq məqsədilə kurs və təlimlərdə iştirak edib, bir çox Fəxri fərman və sertifikatlara layiq görülüb. O, 1976-2001-ci illər ərzində Bakıda və Moskvada təkmilləşmə kurslarında olub.

1992-ci ildə ali dərəcəli səhiyyə təşkilatçısı, 2002-ci ildən isə ali dərəcəli pediatr adını qazanıb. Bundan başqa, E.Həşimov 1985-ci ildə “SSRİ səhiyyə əlaçısı”adına, 1990-cı ildə “Bilik” Cəmiyyətinin, 2004-cü ildə isə Azərbaycan Respublikası Səhiyyə Nazirliyinin fəxri fərmanlarına layiq görülüb.

Həkim pediatriya sahəsi üzrə bir ixtiranın (sirop doktor EVO) və bir kitabın (hipokrat andına sadiqəm) müəllifidir.

2007-ci ildə Azərbaycan Respublikası Prezidentinin sərəncamı ilə ona “Əməkdar həkim” fəxri adına layiq görülüb.