“Həkimlərimizi tanıyaq!” rubrikamızda Sizə Mərkəzi Gömrük Hospitalının xəstələrə xüsusi diqqətlə yanaşan, anında həlledici qərarlar verməyi bacaran yüksəkixtisaslı təcili tibbi yardım həkimi Bəylər İmanovu təqdim edirik.
Bəylər həkim 2015-ci ildə Rusiya Federasiyası Şimali Osetiya Dövlət Tibb Akademiyasının Müalicə işi fakültəsini bitirib, 2015-2018-ci illərdə Tver Dövlət Tibb Universitetində Ümumi cərrahiyyə ixtisası üzrə ordinatura keçib.
O, əmək fəaliyyətinə 2019-cu ildə Azərbaycan Respublikası Dövlət Gömrük Komitəsi Tibbi Xidmət İdarəsinin Mərkəzi Hospitalında Təcili tibbi yardım həkimi kimi başlayıb.
Həkim Mərkəzi Gömrük Hospitalında protokola (CPR, BLS, ACLS, ATLS) uyğun olaraq reanimasiya və stabilləşdirmə tələb edən ağır xəstə və yaralanan xəstələrin təcili qəbulu, stabilləşdirilməsi və ixtisasçılara ötürülməsi; kardiovaskulyar, pulmonar, mədə-bağırsaq, kranioserebral və endokrinoloji xəstəlikləri olan xəstələr üçün ilkin qiymətləndirmə və yardım; xəsarət almış və şok halında olan xəstələrin ilkin və yekun qiymətləndirilməsi; beyin zədəsi olan xəstənin Glazgo Koma şkalası ilə qiymətləndirilməsi və ilkin yardım; baş və üz yaralanmalarının qiymətləndirilməsi, boyun və onurğanın zədələnməsi zamanı immobilizasiya; kiçik cərrahi prosedurların aparılması; xəstələrin ölkə daxilində və ölkə xaricinə nəql olunmasını həyata keçirir.
Bəylər İmanov öz üzərində çalışan, işlədiyi sahəyə aid yerli və dünya mətbuatından yenilikləri izləyən və təcrübəsini zənginləşdirən yüksəkixtisaslı həkimdir. O, 2023-cü ildə ABŞ-ın National CPRF Foundation (Milli CPRF Fondu) tərəfindən “Böyüklərdə, uşaqlarda, yenidoğulmuşlarda boğulma hallarında tibbi yardım. Avtomatlaşdırılmış xarici defibrillyasiya (ilk yardım)” kursunu keçərək sertifikat alıb.
