Bu gün Tibbi Ərazi Bölmələrini İdarəetmə Birliyinin (TƏBİB) təşkilatçılığı ilə “İlan və digər heyvanların zəhəri ilə intoksikasiya diaqnostika, ilk yardım və müalicə” mövzusunda vebinar keçirilib.

Mərkəzi Gömrük Hospitalından Aztibb.az-a verilən məlumata görə, "ZOOM" platforması üzərindən təşkil olun vebinarın işinə TƏBİB-in tabeliyində fəaliyyət göstərən 100-ə yaxın müxtəlif tibb müəssisələrindən tibb işçiləri qoşulub.

Vebinarda Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev “İlan və digər heyvanların zəhəri ilə intoksikasiya, diaqnostika, ilk yardım və müalicə” mövzusunda təqdimatla çıxış edib.

İsmayıl Əfəndiyev vebinar iştirakçılarına ilan, əqrəb, hörümçək, həşərat və digər sancmaların diaqnostikası və müalicəsi ilə bağlı real praktiki hadisələrə əsaslanan təcrübəsi, o cümlədən ilan və digər həşəratlar sancmaları ilə əlaqəli statistik rəqəmlər, kritik klinik hallar, ilan sancmaları zamanı ilk yardımın göstərilməsi barədə ətraflı məlumat verib.

Vebinarın sonunda İsmayıl həkim dinləyiciləri maraqlandıran çoxsaylı sualları cavablandırıb.

TƏBİB-in Davamlı tibbi inkişaf şöbəsinin müdiri Emil İsgəndərov yay aylarında aktual olan mövzuda maraqlı və faydalı çıxışa görə İsmayıl Əfəndiyevə təşəkkürünü bildirib.