Avropa İttifaqının (Aİ) maliyyə dəstəyi ilə həyata keçirilən “Psixi Sağlamlıq Xidmətlərinin Münaqişədən Sonrakı Dövrdə Koordinasiyası və Transformasiyası” layihəsi çərçivəsində Ümumdünya Səhiyyə Təşkilatının (ÜST) Azərbaycandakı Ofisi və TƏBİB ilə birgə Ağcabədi, Ağdam, Bərdə, Tərtər və Füzuli rayonlarında ictimai kampaniya, təlim və superviziyalar təşkil edib.
ÜST-nin Azərbaycan Nümayəndəliyindən Aztibb.az-a bildirilib ki, ilkin səhiyyə xidməti göstərən 70 nəfər tibb heyəti üçün mhGAP üzrə yerli təlimçilər və ÜST-ün beynəlxalq konsultantı Psixi Sağlamlıq üzrə mütəxəssislər tərəfindən “mhGAP” (psixi sağlamlıq sahəsində boşluqları aradan götürmək ücün tədbirlər planı) üzrə təlimlər və fərdi superviziyalar təşkil edilib.
Təlimlər zamanı iştirakçılara depressiya, təşviş pozuntuları, posttravmatik stres pozuntusu və stres kimi psixi sağlamlıq pozuntuları, həmçinin onları müəyyən etmək, idarə etmək və yönləndirmək haqqında məlumat verilib. Məlumatların mənimsənilməsi və praktiki bacarıqların artırılması məqsədilə simulyasiyalar və qrup işləri təşkil olunub. Fərdi superviziyalar zamanı isə təlim almış həkimlərin praktikada mhGAP proqramının tətbiqindəki üstünlüklər və çətinliklər barəsində müzakirələr aparılaraq istiqamətləndirilib.
Həmçinin qeyd edilən 5 rayonda layihə çərçivəsində psixososial dəstəyin təməl prinsipləri üzrə cari ilin mart ayında ÜST-nin Azərbaycandakı Ofisinin mütəxəssislərindən təlim almış TƏBİB-in həssas əhali qrupları ilə iş üzrə koordinatorları üçün superviziyalar da həyata keçirilib. Superviziyalar zamanı koordinatorlarla müraciətçilərin ehtiyaclarının müəyyənləşdirilməsi və müvafiq olaraq yönləndirilməsinin sistemləşdirilməsi haqqında müzakirələr aparılıb.
