Fövqəladə Hallar Nazirliyinin Dövlət Yanğın Nəzarət Xidmətinin, Xətai rayon üzrə Fövqəladə Hallar və Mülki Müdafiə şöbəsinin nümayəndələri tərəfindən Respublika Neyrocərrahiyyə Xəstəxanasının kollektivi üçün maarifləndirmə məqsədi ilə tədbir keçirilib.

Xəstəxanadan Aztibb.az-a bildirilib ki, tədbirin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə müvafiq biliklərin verilməsi olub.

Tədbirdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğınların baş vermə səbəbləri və bu zaman zəruri davranış qaydaları barədə ətraflı məlumat verilib, maarifləndirici videoçarxlar nümayiş olunub, ilkin yanğınsöndürmə vasitələrindən istifadə qaydaları əyani şəkildə nümayiş etdirilib.