“İmişli Rayon Mərkəzi Xəstəxanası” PHŞ-də “Qeyri-sağlam qidalanmanın fəsadları” adlı maarifləndirici tədbir təşkil olunub.

Xəstəxanadan Aztibb.az-a bildirilib ki, tədbirdə müəssisənin rəhbərliyi və həkim kollektivi iştirak ediblər.

Bildirilib ki, qeyri-düzgün və nizamsız qidalanma nəticəsində insanlar çəki problemləri ilə qarşılaşırlar ki, bu da ciddi sağlamlıq problemlərinə yol açır. Xüsusən də zərərli qidalanma piylənmənin inkişaf etməsində əsas rol oynayır.

Qeyd olunub ki, piylənməyə bir çox faktorlar səbəb ola bilər. Onların arasında həddindən artıq və qeyri-düzgün qidalanma ilə yanaşı, fiziki aktivliyin az olması daha geniş yayılmış amildir. Belə ki, qəbul edilən qida payının verdiyi enerji sərf edilən enerjidən çox olduqda piylənməyə yol açır. Xüsusən uşaqlarda sağlam vərdişləri inkişaf etdirmək, onlara zövq verən fiziki aktivliyi yüksəltmək vacibdir və bunun üçün hamılıqla dəstək və fəal olmaq lazımdır.

Diqqətə çatdırılıb ki, mütəmadi fiziki aktivlik ürək-damar xəstəlikləri, II tip şəkərli diabet, bir sıra xərçəng xəstəlikləri, piylənmə, depressiya və sümüklərin kövrəkləşməsinin qarşısını alır.