"Yeni Klinika” tibb müəssisəsində ilk dəfə olaraq icbari tibbi sığortanın Xidmətlər Zərfi daxilində kranioplastika (kəllə sümüyünün bərpası) əməliyyatı icra olunub.

Klinikadan Aztibb.az-a bildirilib ki, 3 ay öncə danışma pozğunluğu, sağ tərəfdə hemiparez ilə təcili yardıma müraciət edən 65 yaşlı kişi xəstənin kranial MRT müayinəsində sol tərəfdə geniş işemik infarkt və ödəm müəyyən olunmuşdur.

Təcili olaraq neyrocərrahlar uzman həkimlər Tural Əhmədov və Orxan Hacıyev tərəfindən dekompresif kraniektomi əməliyyatı icra olunan xəstə reanimasiyadakı müalicəsi tamamlandıqdan sonra reabilitasiya mərkəzinə göndərilmişdir.

3 ay sonra isə yenidən Tural Əhmədov və Orxan Hacıyev tərəfindən xəstəyə öz sümük qrefti yerinə qoyularaq kranioplastika əməliyyatı icra edildi.

Uğurlu əməliyyatdan sonra xəstə təkrar müalicə üçün reabilitasiya mərkəzinə göndərilib.