Böyüklərdə olduğu kimi, uşaqlarda da rast gəlinən baş ağrıları miqren və gərginlik tipli olur. Amma bütün baş ağrıları miqren hesab etmək deyil. Yüksək temperatur, yuxarı tənəffüs yollarının infeksiyası, sinusit, mərkəzi sinir sistemi infeksiyaları, beyin travmaları, hipertaniya da usaqlarda baş ağrılarına səbəb olur.

 

Aztibb.az xəbər verir ki, bu barədə Mingəçevir Şəhər Mərkəzi Xəstəxanasının Uşaq şöbəsinin həkim-nevropatoloqu Vüsalə Aşurova məlumat verib.

Həkim bildirib ki, ailədə (atada ya anada) miqren olan hallarda uşaqlarda rast gəlmə ehtimalı daha yüksəkdir. Miqren təkrarlanan baş ağrısıdır. Ağrılar böyüklərdən fərqli olaraq çox vaxt iki tərəfli olur. İşığa, səsə, qoxuya həssaslıq olur, həmçinin kompyuter və televizora çox baxmaq, nizamsız və az yuxu stress və psixi sarsıntılar da miqreni provakasiya edən faktorlardır.

 

Onun sözlərinə görə, ağrı zamanı uşağı sakit mühitdə, işıqdan, səsdən uzaq durmağa üstünlük verir, çox vaxt yatmaq istəyər və bəzən yuxudan sonra ağrılar sakitləşər. Miqren ağrıları olan uşaqlar daha əsəbi olur, uzun yola çıxan zaman narahatlıq nümayiş etdirirlər. Çox vaxt belə hallarda eyni anda qarında ağrı, qusma və görmə pozuntuları müşahidə olunur. Bəzən hətta baş ağrı olmadan belə qarin ağrı epizodları və eyni anda qusma,iştahsızlıq, urəkbulanma kimi hallar olur ki, buna abdominal miqren deyilir. Bəzən miqren auralı olur. Bu zaman uşaq ağrının başlayacağını əvvəlcədən müxtəlif əlamətlərlə (göz önündə müxtəlif cizgilər, gözdə qaranlıq nöqtələr və parlaq işıq) hiss edir. Ancaq bütün miqren xəstələrində aura olmur. 6 yaşdan kiçik uşaqlar baş ağrısını izah edə bilmir. Şiddətli və səbəbsiz ağlama, yersiz narahatlıq və qusma səbəb kimi göstərilə bilər.

 

Vüsalə Aşurova vurğulayıb ki, istənilən halda baş ağrı şikayəti zamanı uşaq nevroloji olaraq dəyərləndirilməli, yaşına, atakların sıxlığı və ağrının şiddətinə uyğun müvafiq yardım göstərilməlidir..