Beynəlxalq Qızıl Xaç Komitəsi (BQXK) ilə Tibbi Ərazi Bölmələrini İdarəetmə Birliyi (TƏBİB) arasında imzalanan Anlaşma Memorandumuna əsasən BQXK Tərtər və Ağdam rayonlarından seçilmiş 3 kənd həkim məntəqəsinin (Tərtər rayonu - Sarov və Borsunlu kəndləri, Ağdam rayonu - Əfətli kəndi) ilkin səhiyyə xidmətlərini göstərmək bacarıqlarını mövcud ehtiyaclar və boşluqlar əsasında gücləndirmək məqsədilə pilot layihə icra edir.
Bu barədə Aztibb.az-a TƏBİB-dən bildirilib.
Pilot layihə çərçivəsində TƏBİB və BQXK nümayəndələrinin birlikdə Sarov, Borsunlu və Əfətli kəndlərinə monitorinq səfərləri baş tutub.
Səfərlər çərçivəsində kənd həkim məntəqələrinin iş fəaliyyəti ilə ümumi tanışlıq baş tutub. Mövcud vəziyyət və çatışmazlıqlar barədə ətraflı müzakirələr aparılıb, yeni təkliflər dəyərləndirilib.
