Naxçıvan Muxtar Respublikası Səhiyyə Nazirliyi və İcbari Tibbi Sığorta üzrə Dövlət Agentliyinin təşkilatçılığı ilə muxtar respublika xəstəxanasında əməkdaşlığın inkişafı və çatışmazlıqların müzakirəsinə həsr edilmiş tədbir keçirilib.

Bu barədə Aztibb.az-a Naxçıvan Səhiyyə Nazirliyindən xəbər verilib.

Tədbirdə Səhiyyə Nazirliyinin aparat rəhbəri Vüsal Məmmədov, İcbari Tibbi Sığorta üzrə Dövlət Agentliyinin idarə heyətinin sədri Elnur İbrahimov, “Naxçıvan Muxtar Respublika Xəstəxanası” publik hüququ şəxsin direktoru Fehruz Zehirov çıxış edərək keyfiyyətli və sürətli tibbi xidmətin göstərilməsi üçün birgə əməkdaşlığın zəruriliyindən danışıblar.

Agentliyin əməkdaşları Aysel Mikayılova və Qadir Rəfiyev çıxış edərək bildiriblər ki, icbari tibbi sığortanın tətbiq edildiyi tibb müəssisələrində səhiyyənin idarəetmə informasiya sistemi qurulub və sığorta olunanlara göstərilən tibbi xidmətlərə dair hesabatlılıq proqram təminatı üzərindən aparılır.

Tədbirdə medikal informasiya sisteminin təkmilləşdirilərək bəzi dəyişikliklərin edilməsi, sistemdə olan boşluqlar, yaranmış nöqsanlar, yeni modulların yaradılması geniş müzakirə edilib. Qeyd olunub ki, icbari tibbi sığortanın işinin düzgün təşkilində şəffaf maliyyələşmə mexanizminin yaradılması əsasdır. Bunun üçün isə tibb müəssisələrində hesabatların dəqiqliyi təmin edilməlidir.

Agentliyinin əməkdaşları həkimlərin hesabatlarında olan nöqsanları vizual olaraq izah edərək çatışmazlıqların hesablamalara ciddi təsir etdiyini diqqətə çatdırıblar. Vurğulanıb ki, hədəfimiz tibb müəssisələrində icbari tibbi sığorta işinin təşkili prosesinin şəffaflıq və operativlik gözlənilməklə qurulması, aylıq hesabatların vaxtında və dəqiq yerinə yetirilməsidir.