BBSM-dən Aztibb.az-a bildirilib ki, təlimdə Mərkəzin müvafiq departament, şöbə rəhbərləri və əməkdaşları, o cümlədən narkoloji müayinələrin həyata keçirildiyi şəhər poliklinikalarının həkim-laborantları iştirak ediblər.

 

Mərkəzin Ailə həkimliyinin inkişafı şöbəsinin mütəxəssisi Şəbnəm Həsənova narkoloji müayinələrin aparılması, diqqət ediləsi əsas məqamlar, müayinələrdən öncə aparılan profilaktik söhbətlər və s. istiqamətlər üzrə təlim iştirakçılarına məlumatlar verib.

 

Ş.Həsənova bildirib ki, son dövrlər geniş yayılmış narkomaniyanın vaxtında aparılmış müayinələr və qabaqlayıcı tədbirlərlə qarşısını müəyyən qədər almaq mümkündür:

“Rəsmi statistikalardan da görünür ki, son illərdə ölkəmizdə narkotik vasitə və psixotrop maddələrdən istifadə halları artıb. Lakin müvafiq dövlət strukturları tərəfindən atılan qətiyyətli addımlarla narkotik maddələrdən asılılığın qarşısı xeyli alınıb. Bu istiqamətdə hüquq-mühafizə orqanları və digər dövlət qurumları ciddi tədbirlər görür. Narkotik vasitə və psixotrop maddə istifadəçilərinin aşkarlanaraq məsuliyyətə cəlb edilməsi üçün də uğurlu işlər görülür. Bu işdə tibb işçiləri də ayıq-sayıq davranmalıdır. Bunun üçün müayinələr düzgün şəkildə aparılmalı və zamanında tədbirlər görülməlidir”.

 

Mütəxəssis həmçinin, həkim-laborantlara narkoloji müayinələrdən öncə aparılan sorğular barədə məlumat verib. Ş.Həsənova müayinələrdən əvvəlki 1 həftə ərzində hansı dərman preparatlarından istifadə edilməsi, orqanizmdə olan dəyişmələr, yuxu, qida və digər pozuntularla bağlı müvafiq sorğuların keçirilməsinin önəmini xüsusi qeyd edib.

 

Mərkəzin İxtisaslı tibbi xidmətlərin təşkili şöbəsinin müdiri Aytən Sultanova da bu məsələdə tibb işçilərini diqqətli olmağa çağırıb. Bildirib ki, son zamanlar sosial şəbəkələrdə və mətbuatda xüsusən taksi sürücülərinin narkotik maddənin təsiri altında avtomobil idarə etmələrini əks etdirən görüntülər yayılır. Hüquq-mühafizə orqanlarının ayıq-sayıqlığı nəticəsində həmin şəxslər qısa zamanda aşkar olunur və lazımi tədbirlər görülür. Bu prosesdə tibb işçilərinin, həkim-laborantların üzərinə də böyük məsuliyyət düşür: "Ekspress narkoloji müayinələrin aparılmasına dair bütün qaydalara ciddi əməl olunmalı, bu istiqamətdə diqqəti artırmalıyıq".

İnteraktiv formada baş tutan təlimin sonunda iştirakçıları maraqlandıran suallar cavablandırılıb.