Aztibb.az-ın xəbərinə görə, tədbirdə Naxçıvan Muxtar Respublikası Perinatal Mərkəzində çalışan həkim mama-ginekoloqlar və neonatoloq həkimlər iştirak ediblər.

 

Əvvəlcə Naxçıvan Muxtar Respublikası Perinatal Mərkəzi publik hüquqi şəxsin direktor vəzifəsini icra edən Ülkər Bayramova, baş həkimi və direktorun müavini Kifayət Məmmədova çıxış edərək, əhalinin sağlamlığının qorunması, mama-ginekoloji xidmətin keyfiyyətinin artırılması, burada çalışan tibb işçilərinin peşəkarlıq səviyyəsinin yüksəltməsi və praktiki bacaraqlarını təkmilləşdirməsi baxımından tədbiri yüksək qiymətləndiriblər.

 

Təcrübə mübadiləsi zamanı Azərbaycan Republikası Səhiyyə Nazirliyi Elmi-Tədqiqat Mamalıq və Ginekologiya İnstitutunun böyük elmi işçisi, həkim-neonatoloq Lalə Rzayevanın “İstilik zənciri. Döşlə əmizdirmə siyasəti”, mama-ginekoloq Şəhla Əsgərovanın “Antenatal qulluq” və mama-ginekoloqu Kifayət Adıgözəlovanın “Zahılıq dövründə qanaxmalar” mövzusunda məruzələrlə çıxış ediblər.

 

Mama-ginekologiya və neonatologiya sahələrində fəaliyyət göstərən həkimlərin peşəkar bilik və bacarıqlarının artırılması, həmçinin təcrübə mübadiləsinin aparılması, əməkdaşlığın qurulması məqsədi ilə təşkil olunan tədbirdə müasir müalicə üsullarından da söz açılmış, hamiləlik zamanı xromosom xəstəlikləri və döldəki ürək qüsurlarının diaqnostikası, doğulan xromosom xəstəlikli uşaqların müalicəsi, nevroloqun nəzarəti və irsi keçən xəstəliklər zamanı həkim genetiklərin rolu barədə səmərəli müzakirələr, fikir mübadiləsi aparılıb.