Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Yasamal Rayon İcra Hakimiyyəti ilə birgə Hüseyn Cavid Parkında əhali üçün təşviqat aksiyası keçirilib.

Nazirlikdən Aztibb.az-q bildirilib ki, ictimaiyyət nümayəndələri və könüllülərin fəal iştirak etdiyi aksiyanın məqsədi əhalini hepatit virusları barədə məlumatlandırmaqdır.

28 iyul – Ümumdünya Hepatit Günü ərəfəsində keçirilən aksiyada iştirakçılara hepatit virusunun bütün növlərinə yoluxma, xəstələnmə göstəriciləri və bu sahədə görülən tibbi tədbirlər barədə lazımı məlumatlar verilib.

Vurğulanıb ki, xəstəliyə yoluxmamaq üçün steril şpris və iynələrdən, dezinfeksiya olunmuş alətlərdən, şəxsi gigiyena vasitələrindən fərdi qaydada istifadə etmək lazımdır. Aksiya iştirakçılarına sağlamlığa məsuliyyətlə yanaşmaq, gigiyena qaydalarına riayət etmək, sağlam həyat tərzi seçmək tövsiyə olunub.

Aksiya iştirakçılarına İSİM tərəfindən hazırlanaraq nəşr edilən maarifləndirici materiallar paylanılıb.