Aztibb.az TƏBİB-ə istinadla xəbər verir ki, vərəm bakteriyalar tərəfindən törədilən və ağciyərlərin zədələnməsinə səbəb olan xəstəlikdir. Vərəm mikrobları bədənin digər orqanlarını (böyrəkləri, onurğa beynini, beyini zədələyə bilər.

Vərəmin qarşısını almaq və müalicə etmək mümkündür. Buna baxmayaraq, vərəm dünyada ölümə səbəb olan xəstəliklərdən biri olaraq qalır.

 

Vərəm bəzi ağırlaşmalara səbəb ola bilər:

- Oynaqların zədələnməsi,

- Ağciyərlərin zədələnməsi,

- Sümüklərin zədələnməsi,

- Onurğa beyni, beyin və limfa vəzilərinin infeksiyası və zədələnməsi,

- Qaraciyər və böyrəklərin zədələnməsi,

- Ürək toxumalarının zədələnməsi.

 

Vərəm xəstəliyinin əlamətləri vərəm mikroblarının hansı orqanı zədələməsindən asılıdır. Ən çox rast gəlinən vərəmin ağciyər formasıdır və əlamətlərinə, əsasən, öskürək, bəlğəmli öskürək, sinə ağrısı, qızdırma, gecə tərləmələri və üşütmə, çəkinin azalması, zəiflik və s. aid edilir.

 

Vərəm infeksiyası hava-damcı yolu ilə öskürmə və ya asqırma zamanı yayılır. Nəfəs aldıqda havada olan vərəm mikrobları insanın ağciyərlərinə düşür, orada inkişaf edir və xəstəlik törədir.