Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev Aztibb.az-a stenokardiya tutması zamanı etməli olduğumuz məqamları açıqlayıb.

 

Uzman həkim bildirib ki, əgər ağrı fiziki gərginlik zamanı baş veribsə, işi dərhal dayandırmaq və imkan olduqca rahat şəkildə, ayaqları aşağı sallayıb oturmaq lazımdır.

 

Cabir Gülmalıyevin sözlərinə görə, stenokardiya tutması zamanı uzanmaq olmazş Bu vəziyyətdə qan bədənin yuxarı hissəsinə yönəlir və bu halda ürək daha çox yüklənir. Olduğunuz yerə təmiz havanın daxil olmasına şərait yaradılmalıdır:

 

"1 həb (0,5 qr.) aspirin çeynəmək sizi sakitləşdirə bilər. Nitroqliserin (0,0005 qr.) həbini xəstənin dilinin altına qoyun (sprey şəklində də olar) və dərhal “təcili yardım” çağırın. Çünki bu, miokard infarktının əlaməti ola bilər".