Şəkərli diabet, xroniki böyrək çatışmazlığı, hemofiliya xəstəliyi, dağınıq skleroz xəstəliyi üzrə Dövlət Proqramlarının icrası ilə əlaqəli fəaliyyət aparılıb. Hazırda şəkərli diabet xəstəliyi registrində 284 656 xəstə qeydiyyatdadır və Dövlət proqramı çərçivəsində müvafiq tibbi xidmətlə və mərkəzləşdirilmiş qaydada verilən dərman preparatları ilə təmin olunurlar. 2023-cü ilin 6 ay ərzində 4839 yeni xəstə qeydiyyata alınıb.

Aztibb.az xəbər verir ki, bu sözləri TƏBİB-in İcraçı direktoru Vüqar Qurbanov qurumun yarımillik hesabatı ilə bağlı çıxışında diqqətə çatdırıb.

O, həmçinin qeyd edib ki, dağınıq skleroz xəstələrinin registrində olan xəstələrin sayı 2001-dir, onlardan 675 xəstə beta-interferon (avoneks), 300 xəstə isə mitoksantron preparatı ilə təmin olunur. 2023-cü il yanvar-iyun ayları ərzində 34 yeni xəstə qeydiyyata alınıb.

Qurum rəhbəri vətəndaşların şikayətlərinin də diqqətlə araşdırıldığını deyib: “Ötən müddət ərzində Çağrı Mərkəzinə daxil olan 1542 müraciət araşdırılıb və haqlı iradlarla bağlı olan müraciətlər müsbət həllini tapıb. TƏBİB tərəfindən keyfiyyətli və əlçatan tibbi xidmətin təşkili istiqamətində işlər görülür və bundan sonra da bununla bağlı fəaliyyətimiz davam edəcək”.