TƏBİB-in İcraçı direktoru Vüqar Qurbanov ötən gün Beynəlxalq Maliyyə Korporasiyasının (İFC) Avropa üzrə dövlət-özəl tərəfdaşlığı (DÖT) Proqramlarının rəhbəri xanım Mehita Fanninin başçılıq etdiyi nümayəndə heyəti ilə görüşüb.
Bu barədə Aztibb.az-a TƏBİB-dən xəbər verilib.
Görüşdə TƏBİB-in İcraçı direktorunun müavini Araz Nəsirov, aidiyyəti departamentlərin rəhbərləri, Beynəlxalq Maliyyə Korporasiyasının Azərbaycan Nümayəndəliyinin rəhbəri Aliyə Əzimova, İnvestisiya üzrə eksperti Aknur Jumatova iştirak edib.
Görüşün əsas məqsədi səhiyyədə DÖT layihələri üzrə əməkdaşlığın cari vəziyyəti və inkişaf prespektivləri, xüsusilə də ölkədə dializ xidmətlərinin təkmilləşdirilməsi ilə bağlı təklifin müzakirəsindən ibarət olub.
Dializ sahəsində dövlət-özəl sektor tərəfdaşlığı üzrə layihənin detalları müzakirə olunub.
Eləcə də əməkdaşlığın prioritet istiqamətləri, dövlət-özəl tərəfdaşlığının təşviqi sahəsində görülən işlər və perspektiv layihələr barədə fikir mübadiləsi aparıblar.
Vüqar Qurbanov ölkəmizdə maliyyə institutları, o cümlədən Beynəlxalq Maliyyə Korporasiyası ilə əməkdaşlığa toxunaraq, qurumun səhiyyə sahəsində də maliyyə-texniki dəstək göstərilməsi təşəbbüsünü yüksək qiymətləndirib.
Mehita Fanni Azərbaycan hökuməti ilə Beynəlxalq Maliyyə Korporasiyası arasında əməkdaşlığın mövcud vəziyyəti, prioritet sahələr üzrə layihə və təşəbbüslər, eləcə də səhiyyə sahəsində əməkdaşlıq barədə məlumat verib.