"Xızı Rayon Mərkəzi Xəstəxanası" publik hüquqi şəxsdə FHN-nin DYNX-nin Sumqayıt regional DYNİ-nin əməkdaşlarının iştirakı ilə yanğın təhlükəsizliyi ilə bağlı müəyyən olunmuş tələblərə əməl olunması qaydaları ilə bağlı maarifləndirici tədbir keçirilib.

 

Xəstəxanadan Aztibb.az-a bildirilib ki, tədbirdə yanğından mühafizənin qarşılıqlı əməkdaşlıq şəraitində təmin edilməsindən, fövqəladə hadisələrin qarşısının alınması məqsədilə lazımi qabaqlayıcı tədbirlərin görülməsinin daim nəzarətdə saxlanılmasının, səhiyyə müəssisəsinin təxliyə planının müvafiq qaydalara əməl etməklə düzgün hazırlanmasının, yanğın və texniki təhlükəsizlik tədbirlərinə əməl olunmasına nəzarətin artırılmasının, müəssisənin ehtiyat çıxış qapılarının və zirzəmilərinin daim istifadəyə yararlı vəziyyətdə saxlanılmasının, ilkin yanğınsöndürmə vasitələri ilə təchiz olunmasının vacibliyi tibb işçilərinin diqqətinə çatdırılıb.

 

Tədbirdə yanğın təhlükəsizliyi ilə əlaqədar qabaqlayıcı tədbirlərlə yanaşı, əməyin mühafizəsi və texniki təhlükəsizlik məsələlərinə toxunularaq qeyd olunmuşdur ki, təhlükəsiz və sağlam əmək şəraitinin təmin olunması üçün işçilər əməyin mühafizəsi üzrə təlimatlara, əmək və istehsalat intizamına ciddi əməl etməlidirlər.