Azərbaycan Respublikası Prezidenti İlham Əliyevin 16 iyun 2023-cü il tarixli Sərəncamı ilə səhiyyə sahəsində səmərəli fəaliyyətlərinə görə “Tərəqqi” medalı ilə təltif edilənlərdən biri həkim-nefroloq Ağayev Hafiz Ağalar oğludur. O, hazırda TƏBİB-in tabeliyindəki Akademik Mirməmməd Cavadzadə adına Respublika Kliniki Uroloji Xəstəxanasında fəaliyyət göstərir.

 

Aztibb.az xəbər verir ki, Hafiz Ağayev 1971-ci ildə Bakı şəhərində anadan olub. 1988-ci ildə orta məktəbi qızıl medalla bitirib. 1988-1995-ci illərdə N.Nərimanov adına Azərbaycan Dövlət Tibb İnstitutunda təhsil alıb. 1994-1995-ci ildə Akademik Mirməmməd Cavadzadə adına Respublika Kliniki Uroloji Xəstəxanasında internatura keçəndən sonra həkim-nefroloq kimi fəaliyyətə başlayıb.

 

O, 2006-ci ildə tibb üzrə fəlsəfə doktoru alimlik dərəcəsini alıb.

 

Dəfələrlə urologiya və nefrologiya sahəsi üzrə müxtəlif kurslarda iştirak edib, 2011-ci ildə Berlin/Bakı Təhsil Proqramı çərçivəsində Humbolt klinikasında 3 aylıq nefrologiya üzrə kurs keçib.

 

Hafiz Ağayev 2022-ci ildən Akademik Mirməmməd Cavadzadə adına Respublika Kliniki Uroloji Xəstəxanasında Hemodializ şöbəsinin müdiri və həkim-nefroloq kimi fəaliyyət göstərir.