Artıq yay mövsümünü yaşayırıq. Hər bir fəslin öz gözəllikləri olduğu kimi, müəyyən çatışmayan cəhətləri də var. Qızmar günəşin yaratdığı istilik müəyyən bir temperatur həddini keçdikdən sonra öz zərərlərini göstərməyə başlayır. Belə zərərlərdən biri də dəridə yaranan səpgilərdir. Bu yerdə isə həssas təbəqə təbii ki, körpələrimizdir. Onların dərisi temperatura kəskin reaksiya verir, çünki dəri qatı çox nazik və tam formalaşmamışdır.

 

Aztibb.az xəbər verir ki, Sumqayıt Tibb Mərkəzinin 4 nömrəli Ailə Sağlamlıq Mərkəzinin ailə həkimi, pediatr-immunoloq Nərmin Əmirova yayda pediatrlara müraciətlər arasında bişməcə və allergiya ilə bağlı şikayətlərin ilk sıralarda dayandığını bildirib. 

 

Həkim qeyd edib ki, yenidoğulmuşlarda və südəmər uşaqlarda səpgini differensasiya etmək hər zaman rahat olmur. Belə olduğu halda həkim dəqiq anamnez toplamalı, daha sonra əlavə instrumental müayinəyə ehtiyac varsa təyin etməli, nəticəsiylə diaqnozu qoymalıdır: 

 

"Valideyn isə, ilk növbədə, bişməcə və allergik səpgi anlayışı barəsində məlumatlı olmalıdır. Allergik səpgi hər hansısa bir qidaya, məişət-kimyəvi maddələr, ev heyvanlarının tükü, bitkilərin tozcuqları, parça növü, dərman preparatından yarana biləcək səpgidir. Bəzən bu bilgiyə sahib olmaq səpginin səbəbini müəyyən etməyə yetərli olur. Məsələn, süd verən ana qida rasionunda dəyişiklik edibsə və ya körpənin paltarlarını fərqli yuyucu tozuyla yuyubsa, yeni dərman vasitəsi qəbul olunubsa, bu cür hallarda allergen faktoru orqanizmdən kənarlaşdırmaq üçün həkim-mütəxəssis konsultasiyası almaq lazım gəlir."

 

Pediatr-immunoloqun sözlərinə görə, bişməcə tər vəzlərinin funksiyasının dəyişməsi ilə yaranan dəri qıcıqlanmasıdır. Bu zaman tər ifrazı artır, dəri səthindən rütubətin buxarlanması isə azalır, beləliklə, tər vəzi axacaqlarının üzəri bağlanır və tər ifrazı çətinləşir – səpgi yaranır.

 

Nərmin Əmirova bildirib ki, bişməcələrin əsas səbəbləri dəriyə düzgün qulluğun olmaması (südəmərlərdə boyun, qoltuqaltı, qasıq nahiyələrinin yetərli təmizlənməməsi), müntəzəm bədən losyon-yağlarının istifadəsi, aşağı keyfiyyətli bezlər və ya bezin gündəlik az dəyişilməsidir: "Yay aylarında bu sadə qulluq qaydalarına əməl etmək hər bir valideynin borcudur. Əgər qulluq düzgün olarsa, yaxşı nəticəni tez əldə etmək mümkün olacaq".