Adi halda xaya qişası xüsusi maye ifraz edir ki, bu da xaya üçün sanki “sürtgü yağı” funksiyasını daşıyaraq, onun xayalıq daxilində sərbəst hərəkət etməsini təmin edir. Normal halda bu mayenin ifraz olunması və onun geri sorulması prosesində müəyyən bir tarazlıq olur.

 

Aztibb.az xəbər verir ki, bu barədə Mingəçevir Şəhər Mərkəzi Xəstəxanasının həkim-radioloqu Xanbala Bayramov xaya hidropsu barədə məlumat verərkən bildirib.

 

Həkim qeyd edib ki, bu prosesdə tarazlığın pozulması baş verdikdə, ifraz olunan maye xayanın qişaları arasında toplanmağa başlayır ki, nəticədə xayanın hidropsu inkişaf edir.

 

Onun sözlərinə görə, xaya hidropsu anadangəlmə və qazanılma olur. Xəstəlik yenidoğulmuşların təxminən 10%-də təsadüf edilir və əksər hallarda, heç bir müalicə aparılmadan, uşağın 1 yaşınadək olan müddət ərzində keçib gedir:

 

"Qazanılma xaya hidropsu kişilərin istənilən yaş qrupunda təsadüf edilə bilər. Onun əsas inkişaf səbəbləri xayanın kəskin və xroniki xəstəlikləri, xayanın travması, ürək-qan damar çatmazlıqları, xaya orqanlarının şiş xəstəlikləri, bir sıra cərrahi əməliyyatlar və s.-dir".

 

Xanbala Bayramov qeyd edib ki, xaya hidropsu ağrısız və digər hər hansı bir pozğunluq olmadan inkişaf edir. Mayenin yığılması tədricən (bəzən isə birdən-birə, sıçrayışla) və hiss edilmədən baş verir. Xaya hidropsunun diaqnozu həkim baxışı, xayalığın USM və diafanoskopiya (xayanın xüsusi işıqlandırılması) vasitəsi ilə qoyulur.