Azərbaycan Respublikası Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin rəisi, Milli Məclisin Səhiyyə Komitəsinin sədr müavini, t.e.d. Rəşad Mahmudov “Azərbaycanın 2030-cu ilə qədər Vərəmə son verməklə bağlı əsaslı beynəlxalq öhdəlikləri genişləndirmək təşəbbüsü: gündəlikdə Birləşmiş Millətlər Təşkilatının 2023-cü il üzrə Yüksək Səviyyəli Görüşünün Güclü Siyasi Bəyannaməsi” adlı konfransda iştirak edib.

 

Bu barədə Aztibb.az-a Mərkəzi Gömrük Hospitalından xəbər verilib.

 

Qlobal Fond İctimai Vəkillərininn Şəbəkəsi və Azərbaycan Vərəm Əleyhinə QHT Koalisiyasının birgə təşkilatçılığı ilə təşkil olunan tədbirin məqsədi BMT Baş Assambleyasının Vərəmlə bağlı Yüksək Səviyyəli İclasında qəbul ediləcək Vərəmlə bağlı siyasi bəyannamənin hazırlanması prosesini daha diqqətlə izləmək, məsləhətləşmələrdə fəal iştirak etmək və vətəndaş cəmiyyəti təşkilatlarının və icmaların maraqlarını müdafiə edən bəyannamənin qəbul edilməsinə dəstək olmaqdır.

 

Xatırladaq ki, bu il BMT-nin 78-ci plenar sessiyası çərçivəsində Vərəm üzrə Yüksək Səviyyəli Görüşün (BMT YSG) tarixi sentyabrın 22-si üçün müəyyən edilib. BMT-nin Baş Assambleyasının (UNGA) bir hissəsi olaraq, vərəm epidemiyasına sona qoymaq istiqamətində gedişatı sürətləndirmək məqsədilə dünya liderlərinin, siyasətçilərin, vərəmdən təsirlənmiş icmaların, vətəndaş cəmiyyəti təşkilatlarının (VCT) və digər maraqlı tərəflərin bir araya gələcəyi YSG ABŞ-ın Nyu-York şəhərində yerləşən BMT-nin Mənzil Qərargahında keçiriləcək.

 

Tədbirin sonunda QHT-lər, icmalar, ictimai xadimlər, sosial işçilər tərəfindən "Bakı Bəyannaməsi" imzalanıb.

 

Qeyd edək ki, Bəyannamənin beynəlxalq QHT-lər tərəfindən də imzalanması və BMT-in Baş Assambleyasının rəhbərliyinə ünvanlanması nəzərdə tutulur.