Tibbi Ərazi Bölmələrini İdarəetmə Birliyi (TƏBİB), Beynəlxalq Qızıl Xaç Komitəsi (BQXK) və Qazi Universitetinin birgə əməkdaşlığı çərçivəsində Bərdə Rayon Mərkəzi Xəstəxanasının Təlim Mərkəzində “Ailə Həkimi: Qeyri-infeksion xəstəliklərin idarə edilməsi” mövzusunda təlimçilər üçün təlim keçirilib.

Aztibb.az-a TƏBİB-dən bildirilib ki, təlimlər Qazi Universitetinin təlimçiləri tərəfindən aparılıb.

TƏBİB-də sözügedən təlimin təlimçiləri ilə görüş keçirilib.

Görüşdə TƏBİB-in İcraçı direktorunun müavini Araz Nəsirov, İlkin səhiyyə və təcili yardım departamentinin rəhbəri Anar Ağayev, Beynəlxalq əməkdaşlıq departamentinin rəhbəri Ramin Ağayev, Tibbi sığorta departamentinin rəhbəri Səbinə Quliyeva, Təlim və karyera planlaması şöbəsinin müdiri Mədinə Kərimli, Qazi Universitetinin Tibb fakültəsinin təlimçiləri Mustafa Necmi İlhan, Seçil Özkan, İlyas Okur və digərləri iştirak ediblər.

İcraçı direktorun müavini Araz Nəsirov qonaqları TƏBİB-in fəaliyyəti, ölkədə səhiyyə sahəsində aparılan islahatlar, TƏBİB tabeliyindəki xəstəxanalarda tətbiq olunan icbari tibbi sığorta sistemi, rəqəmsallaşma, xəstəxanalarda yenidən qurulan Təcili və təxirəsalınmaz tibbi yardım şöbələri haqqında ətraflı məlumatlandırıb.

Görüşdə tərəflər arasında əməkdaşlıq imkanları müzakirə edilib.

Sonda təlimçilərə təşəkkürnamə təqdim olunub.

Qeyd edək ki, TƏBİB, Beynəlxalq Qızıl Xaç Komitəsi (BQXK) və Qazi Universitetinin birgə əməkdaşlığı çərçivəsində 03-07 iyul 2023-cü il tarixlərində Bərdə Rayon Mərkəzi Xəstəxanasının Təlim Mərkəzində “Ailə həkimi: Qeyri-infeksion xəstəliklərin idarə edilməsi” mövzusunda təlimçilər üçün təlim keçirilib. Təlimin əsas məqsədi ilkin səhiyyə xidməti çərçivəsində qeyri-infeksion xəstəliklərin diaqnostikası, müalicəsi və profilaktikası, tibb işçilərinin bilik və təcrübələrinin artırılmasından ibarətdir.