Hipertoniya-yüksək qan təzyiqi ilə gedən və ömür boyu müalicə tələb edən xroniki bir xəstəlikdir. Müalicə edilmədikdə insult, miokard infarktı və digər ciddi ağırlaşmalarla nəticələnir. Ona görə yüksək qan təzyiqi varsa və xəstə həkimi tərəfindən təzyiq dərmanlarını lazım olan qaydada qəbul edirsə, amma buna baxmayaraq təzyiq düşmürsə mütləq hormonal xəstəliklərin varlığını araşdırmaq lazımdır.

 

Bu barədə Aztibb.az-a Göygöl Rayon Mərkəzi Xəstəxanasının həkim-endokrinoloqu Kəmalə Əliyeva məlumat verib.

 

Həkim hansı hormonal xəstəliklərin yüksək qan təzyiqinə səbəb olduğunu açıqlayıb. Bildirib ki, feoxromositoma-böyrəküstü vəz tərəfindən adrenalin və noradrenalinin artıq ifraz olunması nəticəsində özünü kontrolsuz yüksək qan təzyiqi ilə göstərən ciddi endokrin xəstəlikdir:

 

"Akromeqaliya-hipofiz vəzin şişi olub, özündən aşırı dərəcədə böyümə hormonu ifraz edir. Əllərin, ayaqların böyüməsi, üz cizgilərin kobudlaşması ilə yanaşı ürək- qan damar sisteminə təsir etməklə yüksək qan təzyiqinə səbəb olur.

 

Kuşinq sindromu böyrəküstü vəzdən kortizol hormonunun artiq ifraz olunması ilə gedən, yüksək qan təzyiqi, kilo artımı, şəkər xəstəliyi ilə özünü göstərən endokrin xəstəlikdir".

 

Onun sözlərinə görə, primer hiperaldosteronizm-aldosteron sintez edən böyrəküstü vəz şişi və ya böyrküstü vəz hiperplaziyası səbəb kimi yüksək qan təzyiqi ilə nəticələnir. Müalicəsi cərrahidir. Primer hiperparatiroidizm qalxanabənzər ətraf vəzdən PTH (parathormon) artıq ifraz olunması və kalsium yüksəkliyi səbəbindən xəstələrdə şikayətləri üzə çıxardır. Yüksək qan təzyiqinin səbəblərindən biridir.