TƏBİB-in tabeliyindəki tibb müəssisələrində xidmət keyfiyyətinin yüksəldilməsi, strukturun və idarəetmənin təkmilləşdirilməsi çərçivəsində TƏBİB-in İcraçı direktoru Vüqar Qurbanovun müvafiq təqdimatı ilə bəzi tibb müəssisələrinə təyin olunan direktorlar bu gündən etibarən fəaliyyətə başlayıblar.

Bu barədə Aztibb.az-a TƏBİB-dən məlumat verilib.

Bildirilib ki, bu gün Sabunçu Tibb Mərkəzinin direktoru Nurəngiz Bəşirova, Suraxanı Tibb Mərkəzinin direktoru Ələkbər Tağıyev və M.Ə.Əfəndiyev adına Xətai Tibb Mərkəzinin direktoru Aybəniz Saniyeva çalışdıqları tibb müəssisələrinin kollektivinə təqdim olunublar.

Yeni direktorları kollektivə təqdim edən TƏBİB-in İcraçı direktoru Vüqar Qurbanov onların hər birinə fəaliyyətlərində məsuliyyətli olmaları, çalışacaqları müəssisələrdə mövcud olan çatışmazlıqları və neqativ halları qısa zamanda aradan qaldırmaları, tibb və qeyri-tibb personalının bilik-bacarıqlarının, tibbi xidmət alanların məmnunluğunun yüksəldilməsi istiqamətində zəruri tapşırıqlar verib.

V.Qurbanov mütəmadi olaraq tibb müəssisələrinin maddi-texniki bazalarının, kadr potensialının, infrastrukturunun yaxşılaşdırılması istiqamətində intensiv işlərin aparılacağını da vurğulayıb.

Tibb müəssisələrinin direktorları öz növbələrində rəhbərlik edəcəkləri tibb müəssisələrində xidmət keyfiyyətinin artırılması, qarşıya qoyulan hədəflərə nail olmaq üçün səylə çalışacaqlarını qeyd ediblər.