Gün eynəkləri gözlərimizi günəşin zərərli təsirindən qoruyur: gözlərdə quruluq, katarakta (mirvari suyu), torlu qişanın xəstəlikləri günəş şüalarının zərərli təsirindən kəskinləşə bilər. Azərbaycanımızda günəşli günlər çox olduğu üçün həm faydalanmaq, həm də zərərli təsirindən qorunmaq lazımdır.

Aztibb.az xəbər verir ki, bu barədə "Səhhət" klinikasının oftalmoloqu Vüsalə Orucova gün eynəklərinin necə seçilməli olduğu mövzusunda məlumat verərkən bildirib.

Onun sözlərinə görə, şüşədən olan gün eynəkləri ağır olur, sına bilər, gözə travma vermə ehtimalı var, zərərli şüaları keçirmə faizi də nisbətən yüksəkdir. Plastik eynəklər isə yüngül, təhlükəsiz, qoruyuculuq faizi yüksək olur.

Oftalmoloq qeyd edib ki, keyfiyyət göstəricisi UF-400 olması daha məsləhətlidir (linzada bir küncdə qeyd olunur). Rəngi qara, qəhvəyi, tünd boz və s. ola bilər. Belə rəngli linzalar işığı azaldır, digər görmə keyfiyyətinə təsir etmir - hər şey öz rəngində görünür.