Orqanizmdə olan həyati əhəmiyyətə malik mineral maddə və elektrolitlərdən biri də kaliumdur. Elektrolit olduğu üçün sinir və əzələ keçiriciliyini təmin edir.

Aztibb.az xəbər verir ki, həkim-endokrinoloq Fərhad Burzu bildirib ki, kalium bədənimizə təsir edən daxili və xarici qıcıqlara qarşı cavab reaksiyası verməkdə önəmli rol oynayır. Sinir impulslarının yaranmasını, keçiriciliyini, əzələlərin yığılma və boşalma proseslərini tənzimləyən elektrolitdir. Həmçinin arterial təzyiqin, su-duz mübadiləsinin tənzimlənməsini təmin edir. Kalium ürək damar xəstəlikləri və endokrin xəstəliklər zamanı (şəkərli diabet, odteoporoz və s.) diqqət olunacaq vacib komponentdir. 

Onun sözlərinə görə, kalium orqanizmə qidalar vasitəsi ilə daxil olur. Ən çox özündə kalium saxlayan qidalar aşağıdakılardır:

Banan, ərik, üzüm, ispanaq, kartof, soğan, sarımsaq, kök, noxud, paxlalı bitkilər, qoz, fındıq, püstə, badam, şokalad və s.

Həkim əlavə edib ki, tünd yaşıl yarpaqları olan tərəvəzlər daha çox kalium mənbəyidir.