22-25 iyun 2023-cü il tarixlərində Özbəkistanın paytaxtı Daşkənd şəhərində Neyroproteksiya və Neyroplastikliyin Öyrənilməsi Cəmiyyətinin 18-ci beynəlxalq konqresi keçirilib.
Konqresdə Azərbaycan nümayəndəsi sırasında Səhiyyə Nazirliyinin Elmi-Tədqiqat Tibbi Bərpa İnstitutunun direktoru, prof. Sədaqət Hüseynova, institutun əməkdaşı Könül Əhmədova və ATU-nun Fizioterapiya və reabilitasiya kafedrasının asissenti Rəna Səmədova iştirak ediblər.
Elmi-Tədqiqat Tibbi Bərpa İnstitutundan Aztibb.az-a bildirilib ki, tədbirdə prof. S.Hüseynova çıxış edərək Azərbaycanda insult xidmətinin vəziyyəti, insultlu xəstələrin reabilitasiyasının təşkili və bu sahədə görülən işlərlə bağlı məlumat verib.
Nümayəndə heyətinin üzvləri insultlu xəstələrdə disfagiyanın idarə olunması üçün təşkil olunmuş təlimdə iştirak edib, sertifakat alıblar.
Bununla yanaşı, Avropa Neyroreabilitasiya Federasiyası və Dünya Neyroreabilitasiya Federasiyası rəhbərliyi ilə gələcəkdə Azərbaycanda neyroreabilitasiyanın inkişaf yolları müzakirə olunub, kadr mübadiləsi, birgə tədqiqat layihələri və proqramlara dair fikir mübadiləsi aparılıb.