1869-cu il iyunun 27-də alman embrioloqu Hans Şpeman (1869-1941) anadan olub. O, 1935-ci ildə "Embrion inkişafındakı təşkilatçı effektinin kəşfinə görə" Fiziologiya və Tibb üzrə Nobel Mükafatına layiq görülüb.

Hans Almaniyada Ştutqartda naşir ailəsində dünyaya gəlib. Gəncliyində klassik ədəbiyyatla maraqlanıb, amma tibbin xeyrinə seçim edib. Həkim olmağa hazırlaşaraq Heydelberq Universitetində tibbi öyrənib.

Gözlənilmədən embriologiya ilə məşğul olub və Vyarsburq Universitetinin Zoologiya İnstitutunda dünyanın ən aparıcı embrioloqlarından biri olan Teodor Boverinin rəhbərliyi altında elmi tədqiqatlara başlayıb.

Elmi məsələləri həll etmək üçün mürəkkəb metodikaları və cihazları işləyib hazırlayıb. Onun ilk elmi işləri göz büllurunun təcrübədə formalaşmasına həsr olunub. Öz tədqiqatlarında H.Şpeman embrionun inkişafının ardıcıllığını və onun ayrı-ayrı hissələri arasında qarşılıqlı əlaqəsini müəyyən edib.

Bu işlər nəticəsində o, embrionun “təşkil mərkəzlərini” müəyyən edib (bu mərkəzlər embrionun sonrakı formalaşmasına təsir edir). H.Şpemanın işləri embriologiyanın sonrakı inkişafının əsasını qoyub.

Alim 1941-ci ilin sentyabrın 12-də vəfat edib.

Aztibb.az