Tibbi Ərazi Bölmələrini İdarəetmə Birliyinin (TƏBİB) tabeli tibb müəssisələrinin hemodializ şöbələrinə baxış keçirilib.

Bu barədə Aztibb.az-a TƏBİB-dən xəbər verilib.

TƏBİB-in İxtisaslı tibbi yardım departamentinin Xüsusi profilli tibbi xidmətlərin təşkili şöbəsinin əməkdaşları və "Xroniki böyrək çatışmazlığından əziyyət çəkən şəxslərə göstərilən tibbi xidmətlərin keyfiyyətinin artırılması və müalicəsinin təşkilinin təkmilləşdirilməsi üzrə Komissiyanın" bir qrup üzvü Sabunçu Tibb Mərkəzi, Mərkəzi Neftçilər Xəstəxanası və Akademik M.Cavadzadə adına Respublika Kliniki Uroloji Xəstəxanasının hemodializ şöbələrini ziyarət ediblər.

Ziyarət zamanı tibb müəssisələrinin rəhbərliyi, müvafiq şöbə müdirləri və məsul tibb işçiləri ilə birlikdə hemodializ şöbəsinin ümumi fəaliyyəti, xəstələrə göstərilən tibbi xidmətin keyfiyyəti dəyərləndirilib.

Hemodializ şöbələrində işin təşkili istiqamətində müxtəlif təlimatlar verilib, tibbi personal tərəfindən ünvanlanan suallara aydınlıq gətirilib və təkliflər müzakirə edilib. Tibbi xidmətin keyfiyyətinin və əlçatanlığının təmin edilməsi istiqamətində fəaliyyətlərə dair müzakirələr aparılaraq, tibb müəssisələrinin rəhbərləri və şöbə müdirlərinə zəruri tapşırıqlar və tövsiyələr verilib.