Akademik M.Ə.Mirqasımov adına Respublika Klinik Xəstəxanasının direktor müavini, keçmiş baş həkimi, Naxçıvan Ali Məclisinin V və VI üzvü, Əməkdar həkim Telman İbadov yaş həddi ilə əlaqədar təqaüdə çıxıb.

 

Aztibb.az-a Respublika Klinik Xəstəxanasından verilən məlumata görə, bununla bağlı keçirilən tədbirdə müəssisənin direktoru Elviz Qasımov Telman həkimin ölkə səhiyyəsinin inkişafında əvəzolunmaz rolu olduğunu bildirib. Qeyd edib ki, o, ölkə başçısı İlham Əliyev tərəfindən bir neçə mükafata layiq görülüb. 2009-cu ildə Azərbaycan Respublikası Prezidentinin sərəncamı ilə “Azərbaycan Respublikasının Əməkdar həkimi” fəxri adı və 2019-cu ildə Azərbaycan Xalq Cümhuriyyətinin 100 illiyi (1918-2018) yubiley medalı ilə təltif edilib.

 

Elviz Qasımov vurğulayıb ki, Telman İbadov tibb müəssisəsində fəaliyyət göstərdiyi müddət ərzində həm kollektivin, həm də vətəndaşların böyük sevgi və hörmətini qazanıb.

 

Daha sonra xəstəxananın baş həkimi Sərdar Əsədov və həkimləri Telman İbadovla bağlı xoş xatirələrini bölüşüblər.

  

Sonda Respublika Klinik Xəstəxanasının rəhbərliyi və kollektivi adından Telman İbadov uzunmüddətli səmərəli fəaliyyətinə görə təşəkkürnamə ilə təltif edilib.