Ultrasəs müayinəsi tibbdə aparılan əsas müayinə üsullarından biridir. Exolokasiya prinsiplərinə əsaslanan bu müayinə metodu orqanizmə zərər vurmadan daxili orqanlar və boşluqlar haqqında dəqiq məlumat vermək imkanına malikdir.

 

Bu barədə Aztibb.az-a Mingəçevir Şəhər Mərkəzi Xəstəxanasının həkim-radioloqu Nigar Hüseynova məlumat verib. Onun sözlərinə görə, USM aparatı müvafiq cihaz vasitəsilə orqana yönəldilmiş ultrasəs dalğalarının əks olunma tezliyini qeydə almaqla orqanın ölçüsü, forması, exogenliyi və sair barədə informasiya formalaşdıraraq ekranda göstərir. Qarın boşluğu USM-i daha çox qarın ağrısı, ürək bulanma-qusma, böyrək ağrıları, sidikdə qan, travma və yol qəzaları, həzm şişkinliyi, qarında hiss olunan kütlə, xərçəng müayinəsi, genetik xəstəliklərin diaqnozu, sistemik xəstəliklərin daxili təsirlərini qiymətləndirmək kimi travmalar üçün, orqanlarda olan xərçəngi və müalicənin gedişatını təqib etmək üçün istək oluna bilər. Bundan əlavə, qaraciyərin yağlanmasından körpələrdə orqan ölçülərinin qiymətləndirilməsinə qədər geniş şəkildə istifadə olunur.

 

Radioloq qeyd edib ki, bu müayinə ilə orqanların ölçüləri, onların daxili strukturu, yerləşmə patologiyaları, əlavə törəmələr, ocaqlı patologiyalar, kəskin və xroniki xəstəliklər, travmatik zədələnmələrdən sonra daxili qanaxmalar üçün xas olan dəyişikliklər aşkar edilir.