Dünyadakı Azərbaycanlı Təbiblərin Simpoziumunda iştirak üçün xaricdən gələn azərbaycanlı həkimlər Kliniki Tibbi Mərkəzdə olublar.
Aztibb.az-a TƏBİB-dən verilən məlumata görə, simpoziumun işgüzar proqramı çərçivəsində qonaqlar mərkəzin korpusları ilə tanış olublar. Daha sonra “Üz-çənə cərrahiyyəsində müasir müalicə metodları” və “Kardiocərrahiyyədə müasir müalicə metodları” mövzularında panel müzakirələri təşkil olunub.
“Üz-çənə cərrahiyyəsində müasir müalicə metodları” adlı panel müzakirəsində Birləşmiş Ərəb Əmirliklərində fəaliyyət göstərən təbib Sabrin Əzim “Mükəmməlliyə gedən yol: Ağız və üz-çənə cərrahiyyəsində JCI”, “Kanada və Avstraliya akkreditasiyasına hazırlığın qiymətləndirilməsi. Biz harada dayanırıq?”, Almaniyada çalışan həkim Elşən Ağayev “Üz sümüklərinin travmalarında yeni müalicəvi yanaşmalar”, Rusiyada fəaliyyət göstərən Adil Məmədov “Uşaq stomatologiyası və anadangəlmə dodaq-damaq yarıqlarında müalicə metodları” mövzularında təqdimatlarla çıxış ediblər.
“Kardiocərrahiyyədə müasir müalicə metodları” adlı panel müzakirəsində Türkiyədə fəaliyyət göstərən Amir Ağayev “Ürək və damar cərrahiyyəsində minimum xərc, maksimum fayda”, Rusiyada çalışan Mehman Məmmədov “Ürək - damar xəstəliklərinin müalicəsində yeniliklər”, Almaniyada fəaliyyət göstərən təbib Rövşən Məmişov “Torako-Abdominal Aorta Anevrizmalarının müasir müalicə metodları” və “Periferik damar tutulmalarında istifadə olunan müasir invaziv revaskularizasiya metodları”, Rusiyada çalışan Emin Səlimov isə öz növbəsində “Transfuziologiyada müasir trendlər” mövzularında təqdimatlarla çıxış ediblər.
Sonda TƏBİB-in tabeliyindəki tibb müəssisələrində kardiologiya, ümumi cərrahiyyə, ürək-damar cərrahiyyəsi və torakal cərrahiyyə üzrə fəaliyyət göstərən mütəxəssislər tərəfindən iştirakçıların sualları cavablandırılıb, fikir mübadiləsi aparılıb.
