Tibbi Ərazi Bölmələrini İdarəetmə Birliyinin (TƏBİB) təşkilatçılığı ilə keçirilən Dünyadakı Azərbaycanlı Təbiblərin Simpoziumunda iştirak üçün xaricdən gələn azərbaycanlı həkimlər TƏBİB-in tabeliyindəki Lənkəran Rayon Mərkəzi Xəstəxanasının fəaliyyəti ilə tanış olub.

TƏBİB-dən Aztibb.az-a bildirilib ki, simpoziumun işgüzar proqramı çərçivəsində “Cərrahiyyə sahəsi üzrə dünya təcrübəsi”, “Daxili xəstəliklərin müalicəsində yeni yanaşmalar”, “Ana və uşaq sağlamlığına strateji yanaşma” mövzularında panel müzakirələr təşkil edilib.

“Cərrahiyyə sahəsi üzrə dünya təcrübəsi” adlı panel müzakirəsində Almaniyada fəaliyyət göstərən təbib Vüqar Yaqublu “Yumşaq toxuma şişlərinin diaqnostikası və müalicəsi”, ABŞ-da çalışan təbib Pərviz Hacıyev “Uşaq urologiyasında təcili hallar”, Almaniyada fəaliyyət göstərən təbib Seymur Kərimli “Aortanın disseksiyası” mövzularında təqdimatlarla çıxış ediblər.

“Daxili xəstəliklərin müalicəsində yeni yanaşmalar” adlı panel müzakirəsində Rumınyada fəaliyyət göstərən həkim Emin Məmmədov “Piramidal payın klinik əhəmiyyəti”, Türkiyədə çalışan Aysel Paşayeva Bulut “Şəkərli diabetli xəstələrin müalicəsi və nəzarətdə saxlanması mövzularında təqdimatlarla çıxış ediblər.

“Ana və uşaq sağlamlığına strateji yanaşma” adlı panel müzakirəsində Səudiyyə Ərəbistanında fəaliyyət göstərən Röya Hüseynova “Təcili neonatoloji xidmətlərin təşkilində yeniliklər”, Almaniyada çalışan Səbinə Hacızadə “İnsan papilloma virus (HPV) genotipinin yaşa və cinsə görə dəyərləndirilməsi”, Türkiyədə çalışan Melahat Atasever "Keysəriyyə kəsiyindən sonrakı ağırlaşmalar: Çapıqdan sonrakı hamiləlik" mövzularında təqdimatlarla çıxış ediblər.

Sonda mütəxəssislər tərəfindən iştirakçıların sualları cavablandırılıb, fikir mübadiləsi aparılıb.