Naxçıvan Muxtar Respublikası Səhiyyə Nazirliyi tərəfindən əhaliyə yüksək səviyyəli tibbi xidmət göstərmək və səhiyyənin inkişafı istiqamətində davamlı islahatlar aparılmaqdadır. Aparılan islahatlar içərisində qanun pozuntusuna yol vermiş tibb işçiləri haqqında qanunauyğun olaraq tədbirlər də öz əksini tapmaqdadır.

 

Naxçıvan Səhiyyə Nazirliyindən Aztibb.az-a bildirilib ki, növbəti belə tədbir Naxçıvan Muxtar Respublikası Perinatal Mərkəzi publik hüquqi şəxsin işçiləri haqqında olub. Belə ki, vəzifə təlimatı qaydalarını pozub, vəzifələrinin icrasına laqeydlik göstərdiklərinə görə Perinatal Mərkəzin müalicə işləri üzrə müavini tutduğu vəzifədən azad edilərək həkimlər sırasından çıxarılıb, 3 şöbə müdiri tutduğu vəzifədən azad edilərək aşağı vəzifəyə keçirilib, 1 mama-ginekoloqa isə töhmət intizam cəzası verilib.

 

Naxçıvan Muxtar Respublikası Səhiyyə Nazirliyi tərəfindən bundan sonra da əhaliyə göstərilən tibbi xidmətin keyfiyyətinin artırılması istiqamətində tədbirlərin görülməsi davam etdiriləcəkdir.